أطفال علماء:  "تجربة أو لعبة التوازن"

 علقي شماعة على مقبض الباب ، واحضري كوبايتين بلاستيك متشابهين ، اربطيهم  بخيط طويل بس متساوي على جانبين الشماعة، وابدئي التجربة أو اللعبة ، حاولي توازني بين أشياء مختلفة واشرحي ببساطة فكرة "التوازن"

http://inspirationlaboratories.com

لعبة البحث عن الكنز " الأشكال الهندسية "

لعبة البحث عن الكنز لعبة مسلية جدا، ومفيدة كمان، فمثلا لعبتنا هنا بتقوي معرفة الطفل بالأشكال الهندسية، والألوان، وكمان الأعداد، وبيعتمد الفوز فيها على تحديد عنصري الشكل واللون وربطهما معا:
- أولا : اصنعي الأشكال الهندسية من الورق الكارتون مثل : المثلث والمربع والمعين والدائرة

- لونيهم بألوان مختلفة بإنك تغلفيهم بأوراق القص واللصق الملونة

 - ارسمي في ورقة الأشكال الموجودة عندك ولونيهم واكتبي رقم بجانب كل شكل، بمعنى ان الطفل المفروض عليه يبحث ويجد مثلا: ثلاثة مثلثات لونهم أخضر، ومربعين لونهم أصفر، ودائرتين لونهم أحمر ومعين لونه أزرق، أنا عملتهم على الكمبيوتر وطبعتهم

- بدأ وقت اللعب: حاولي تخبي الأشكال في أماكن مختلفة: تحت المخدة، وراء الباب، بين الكتب... وفي أي مكان ممكن الأولاد يوصلوا له  " يا ريت في أول محاولة تكون الأماكن ظاهرة، وتعرفيهم ازاي يبحثوا"، ثم اعطي اشارة البدء واللي يجد الأشكال الموجودة في الورقة أولا هو الفائز

- طبعا هيبقى صعب في الأول ان الطفل يربط بين الشكل واللون في نفس الوقت، علشان كده لازم تعرفية واحدة واحدة، يعنى لما يلاقي مثلث لونه أصفر تقولي له "برافو لقيت مثلث بس تعالى نبص في الورقة كده احنا عاوزين مثلث لونه ايه؟ أخضر ، طيب وده لونه ايه؟ اصفر يبقى نكمل بحث ، وهكذا

- ممكن بعد كده تخليه هو يخبي الأشكال وانت تبحثي عنها

- وطبعا في البداية وتمهيدا للعبة اطلبي منهم يبحثوا على أساس الشكل بس ، ثم على أساس اللون بس ، يعني خديها بالتدريج .... H
 

أغاني circle time:

- أغنية المتضادات : ده الفيديو

- افتح  اقفل، افتح  اقفل، صفق بإيدك " تصفقوا ثلاث مرات "
افتح اقفل، افتح  اقفل ، خبط على رجلك " تخبطوا ثلاث مرات"
  " تفتحوا ايدكم وتقفلوها"

- كبير  صغير، كبير  صغير، كبير..كبير..كبير... كبير...صغير "تشيروا بأيدكم إلى الحجم"

- من فضلك   لأ شكرا، من فضلك  لأ شكرا، من فضلك.. من فضلك.. من فضلك ... لأ شكرا " تشيروا بأيدكم بما يدل على الطلب أو الرفض"

سريع   بطئ ، سريع   بطئ ، سريع..سريع... سريع.. سريع... بطئ " حركوا أيديكم بسرعة أو ببطء"

- عالي "نقولها بصوت عالي"، هادي " نقولها بصوت هادي"،عالي  هادي، عالي.. عالي.. عالي.. عالي... "ششش" هادي

 وفي النهاية..
بيكا بو، بيكابو، بيكا.. بيكا..بيكا.. بيكا ... بوووو...peek a - boo
" بنحب نقولها قوي، هي زي "بخ"  عندنا بالعربي


- ممكن تجربوا الأغنية دي في كل المتضادات ،مثل:
- سعيد، وحزين
- بعيد، قريب
- طويل، قصير.... وهكذا

مونتسوري : نشاطات تنمية الحواس

1- صندوق الألوان:
      الهدف من هذا النشاط : هو تنمية قدرة الطفل على التمييز بين الألوان
 
       - المرحلة الأولى " من سن 3 سنين ":
صندوق الألوان ده عبارة عن صندوق صغير موجود فيه مجموعة من القطع الملونة ،بحيث يكون لكل لون قطعتين متطابقتين

 -في البداية بتقولي للطفل ان في حاجة جميلة عاوزاه يشوفها "حاولي دايما تهتمي بعنصر التشويق" وبعد ما تفتحوا الصندوق تطلعي 3 ألوان بس في الأول ، مثلا الأحمر والأصفر والأزرق "طبعا لكل لون قطعتين"

- تضعي لون من الألوان وليكن الأحمر على طرف السجادة أوالطربيزة وتقولي للطفل : "أنا أبحث عن قطعة شبه القطعة دي بالظبط"

 - وعندما يجدها نضعها بجانب الأخرى

- ثم افعلي نفس الشئ مع باقي الألوان ؛ فتضعي اللون الأزرق تحت الأحمر مباشرة وتسألي الطفل " هل ممكن تجد قطعة تشبهها تماما؟"

 - ممكن قوي تعملي الصندوق ده بنفسك:
مش محتاجة غير بعض قطع صغيرة من الخشب، أو الكارتون

- وبكل سهولة الصقي عليها ورق ملون من " القص واللصق"

- وبكده يكون صندوق ألوانك جاهز.

نشاطات من المنتسوري : مكرونة الاستكشاف

نشاط "مكرونة الأكتشاف"
هدف النشاط :
1 توظيف حب الأكتشاف لدي الأطفال في مكان مفيد
2 تقوية العضلات الدقيقة والغليظة للطفل
3 تنمية التركيز
المواد المستخدمة :
1 صندوق
2 مكرونة
3 ألعاب
قومي بوضع الألعاب داخل المكرونة في قلب الصندوق ، أجعلي طفلك يبحث عن ما تخبئة المكرونة داخلها ، ساعدي طفلك علي تعلم صوت أول حرف من اللعبة التي يكتشفها ، شجعي طفلك علي التحدث عن اللعبة مثل : الفيل حيوان أكل للعشب ضخم له خرطوم وهكذا 
 

نشاطات من المنتسوري

 للأطفال الصغار ، النشاط ده بيشغلهم ويعلمهم مهارات جميلة وكمان بيقوي عضلات اليد والأصابع، وممكن تعمليه في البيت... " H "
 

من ألعاب التخيل

ممكن طفلك الصغير يقضي وقت ممتع في البيت ، والجميل إنك مش هتحتاجي تشتري أي شئ زياده عن اللي موجود في بيتك، فمثلا:
- لعبة التسوق: تقدري تكوني أي متجر أو محل للطفل ليشتري أويبيع منه، محل ملابس، محل ألعاب، أو حتى سوبر ماركت وتضعي على الرفوف علب قديمة فارغة، وممكن عن طريق اللعبة دي تعلمي الطفل التعامل بالنقود، والجمع والطرح، أو حتى الأرقام لو لسه صغير، وجميل قوي إنك تحاولي تعلميه أو تعلميها تستخدم القائمة، وطبعا هتكون بالصور ، تعمل صح على اللي اشتريته وده هيعلمهم النظام... " H "